O ser humano buscou sempre a felicidade por diferentes camiños.
As benaventuranzas representan a síntese da mensaxe de Xesús. As palabras de Xesús nesta mensaxe causaron unha profunda impresión en moitas persoas non cristiás. Por exemplo, Gandhi quedou fascinado pola elevación espiritual que encontrou nas benaventuranzas.
Nas benaventuranzas, Xesús sinala un camiño novo que leva á felicidade. Xesús recoñoce a dignidade das persoas e declara ditosos ós grupos humanos excluídos, considerado de ordinario malditos e desgraciados pola sociedade. Iso era algo totalmente novo e verdadeiramente liberador para a xente marxinada.
As benaventuranzas propoñen unha serie de valores que levan á autentica felicidade: misericordia, sensibilidade, pobreza, desprendemento, limpeza de corazón, humildade, traballo pola paz, loita pola xustiza.
Xesús dirixe o sermón das benaventuranzas non só os seus discípulos, senón á multitude, que se amorea para escoitalo.
As benaventuranzas expresan o estilo de vida que Xesús propón para seguir o camiño do amor e ser felices. Neste camiño, Xesús de Nazaret amósase como modelo e exemplo que hai que seguir.
